Madaxweynaha dalka Kenya Mwai Kibaki ayaa martiqaad u fidiyay Madaxweynaha Somaliland Md. Daahir Rayaale Kaahin
September 16, 2008

Madaxweynaha dalka Kenya Mwai Kibaki ayaa martiqaad u fidiyay Madaxweynaha Somaliland Md. Daahir Rayaale Kaahin.

Wakiilka Somaliland u fadhiya magaalada Nayrobi ee dalka Kenya Md. Maxamed Axmed Indhabuur oo hadda ku sugan magaalada Hargeysa ayaa shalay telefiishanka Space Channel u xaqiijiyay in Madaxweyne Rayaale martiqaad rasmi ah ka helay dhiggiisa Kenya, “Madaxweynaha dhawaan ayaa laga martiqaaday inuu Kenya soo booqdo, waana sababta aan halkan [Somaliland] u imid, oo warqadaas casuumadda ah ayaan ka siday Madaxweyne Kibaki oo aan u siday Madaxweyne Rayaale.” Ayuu yidhi Wakiilku, waxaanu intaas raaciyay inuu martiqaadkii uu ka siday madaxweynaha Kenya uu magaalada Addis Ababa ugu gudbiyay Madaxweyne Rayaale oo hadda booqasho ku maraya dalal ka tirsan qaaradda Yurub.

Mr. Indhabuur, waxa kale oo uu sheegay inay dhawaan magaalada Hargeysa ee Somaliland socdaal shaqo ku iman doonaan Mudanayaal ka tirsan Baarlamaanka Kenya, waxa kale oo uu wakiilku xusay in Baasaaboorka Somaliland hadda lagu galo gudaha dalka Kenya.

Madaxweyne Rayaale ayaa sannadkii 2006, socdaal ku maray wadamo badan oo Afrika ah oo uu ka mid yahay dalka kenya.

__

Source: Hadhwanaag News