Inka Badan 40 Xubnood Oo Ah Garabkii Cabdiraxmaan Aw Cali Oo Sheegay Inay Aqbaleen Go'aankii Gudida Dhex-dhexaadinta
September 26, 2008

Dhinaca kale Cadami ayaa isna sheegay inuu aqbalay go aanka gudida dhex- dhexaadinta

Koox ka mid ah garabkii ka cadhooday natiijadii ka soo baxday shirkii Golaha Dhexe ee xisbiga KULMIYE uga furmay magaalada Burco, ayaa sheegay inay si buuxda u ayidsan yihiin go’aankii Arbacadii habeen hore ay soo saartay ergadii dhexdhexaadinta dhinacyada is khilaafsan ee KULMIYE.

Kooxdan oo tiradooda ku sheegtay inay ka badan yihiin afartan xubnood oo ka tirsan Golaha Dhexe ee KULMIYE isla markaana uu hoggaaminayo Axmed Xaaji Cali Cadami oo caawa xilli dambe shir-jaraa’id ku qabtay magaalada Hargeysa, waxay caddeeyeen inay taageersan yihiin go’aankii ergada dhexdhexaadintu ka soo saartay khilaafkii ay dhinaca ka ahaayeen ka dhex jiray xisbiga KULMIYE, isla markaana wixii tabasho ah ee ka dhiman go’aankaas ay kala xaajoonayaan hoggaanka sare ee xisbiga, iyada oo ay tilmaamay inay si weyn ugu rajoweyn yihiin in khilaafkii xisbigu halkaa ku dhammaan doono.

kooxdani waxay shirkoodaa jaraa''''ir ka akhriyeen saddex qodob oo ay ku gaadheen kulamo iyaga dhexdoodu yeesheen, kuwaas oo kala ahaa:-

1. In la ayido go’aankii guddiga dhexdhexaadintu ka soo saartay xallinkta khilaafka KULMIYE.

2. Wixii tabashooyin iyo sixitaan ah ee ka dhiman go’aankaa toos loogala doodo hoggaanka xisbiga, intii meel kale iyo waqti kale kulumi lahaa.

3. In ka noqosho lagu sameeyo warqad hore loo qoray oo qalad ahayd oo codsanaysay in shirguddoonka Golaha Dhexe shir aan caadi ahayn qabto.

Go’aankaas oo uu akhriyey Axmed Xaaji Cali Cadami, waxa kale oo uu sheegay in la magacaabay guddi samaysa wixii turxaan bixin ah loo baahan yahay, guddigaas oo ka kooban toddoba xubnood, waxay kala yihiin:

1. Axmed Xaaji Cali Cadami, Guddoomiye
2. Xil. Siciid Cilmi Rooble
3. Xil. Axmed Cabdi Kijaandhe
4. Cabdillaahi Ismaaciil Cabdi (Bidhaan)
5. Maxamed Muuse Cabdi (Galaydh)
6. Cabdillaahi Jaamac Calas
7. Faysal Daahir Camuud.