Ciidamada AMISOM Oo Xasuuq Ka Geystay Suuqa Bakaadhaha Ee Muqdisho
September 27, 2008

Ciidamada Yugandha ee ku sugan magaalada Muqdisho ayaa madaafiic 10-neeyo ka badan ku gadhaacay maanta suuqa Bakaaraha ee magaalada Muqdisho.

Ciidamada Yugandha oo ka cadhooday diyaarad Millateri oo saanad u siddey iyaga oo lagu duqeeyay Gadhoonka diyaaradaha Muqdisho ayaa taas bedelkeeda waxa ay Madaafiic la beegsadeen suuqa Bakaadhaha oo ay ku dileen tiro dad ah oo ka badan 10-ruux, 20-ruux tiro ka badanna wey ku dhaawacmeen.

Suuqa Bakaadhaha oo maanta si aad ah u camidhnaa iyadoo ay ka dukaamaysanayeen dadka u diyaadhgaroobaya Ciidda Fitriga ayaa mar qudha lagu kala cadhadhay markii madaafiicdu ay ku soo bilowdeen, iyadoo uu hakad galay dhaqdhaqaaqii ganacsiga.

Diyaaraddii u socotay ciidamada Yugandha ee soo caga dhigatay Gadhoonka diyaaradaha Muqdisho ayaa si nabad ah u duushay iyadoo dad badanna ay darteed u geedhiyoodeen, mana aha markii ugu horreysay oo ciidamada AMISOM ay duqeeyaan Gadhoonka diyaaradaha Muqdisho tan iyo markii kooxda Al-shabaab ay ku dhawaaqday inay xidhay Gadhoonkaas, iyadoo mar waliba oo la duqeeyo Gadhoonkana ay ciidamada AMISOM ku soo jawaabaan madaafiic ay ka dhalato qasaaro dhimasho iyo dhaawac fara badan oo dadka rayidka soo gaadha.

__

Source: Hadhwanaag News